طريقة عمل ملبس ومصاصّة بالفراولة للأطفال بالصور من الأختين الحلوين هناء وشيرين
طريقة عمل ملبس ومصاصّة بالفراولة للأطفال بالصور
how to make strawberry lollipop for kids
السلام عليكم ورحمة الله وبركاته
نقدم لكم اليوم وصفة سهلة لعمل الملبس والحلوى والمصّاصة lollipop بالفراولة الطبيعية
بدون اضافه ألوان صناعيه وبمكونات موجودة فى كل بيت
المقادير
2 كوب سكر
معلقة كبيرة عسل نحل
معلقة صغيرة خل
فراولة
الطريقة
أول حاجة هنجيب كام حبة فراولة ونحط عليها معلقة سكر
وننقعها فى ماية من بليل للصبح
لغاية ما الماية تاخد اللون الاحمر وطعم الفراولة ويبقى لون وطعم طبيعى
ونصفى الفراولة من مايتها وناخد ثلثين كوب من الماية الناتجة وهى دى اللى هنستخدمها
( مش هنستخدم الفراولة هنستخدم الماية بتاعتها بس )
بعد كده بنحط السكر والخل وعسل النحل على ماية الفرولة ونحطهم على نار هادية
ونقلب براحة خالص عشان متتكتلش مننا على الاجناب
الحكاية دى بتاخد حوالى 10 دقايق لغاية ما السكر يدوب
اثناء ما الخليط على النار الهادئة بنحضر القوالب اللى هنصب فيها الملبس
احنا هنا استخدمنا قوالب الشيكولاته السيليكون
وكمان نحضر مفرش سيليكون ونحط عليه عصيان المصاصة او الlollipop
ولو مش عندك حطى شفاطة
ولو مش عندك مفرش سيليكون امسحى ورق ألومنيوم بشوية زيت صغيرين واستخدميه
نرجع تانى للخليط بتاعنا
أول ما نحس ان السكر كله داب بنعلى النار شوية لغاية ما يتقل ويوصل للقوام المظبوط
عشان نوصل للقوام المظبوط بنعمل اختبار للخليط
بنحط نقطة على ماية ساقعة
لو دابت فى الماية يبقى لسه شوية
ولو اتجمدت وبقت صلبة يبقى خلاص
كده خلاص وصلنا للقوام المظبوط
بنعمل للخليط حمام ماية ساقعة لمدة 10 ثوانى
بعد كده نبدأ نصب فى القوالب وكمان نعمل المصاصة أو ال lollipop
وده الشكل النهائى بعد ما بردوا خالص
فرحوا نفسكوا وأولادكوا بحلويات لذيذه من صنع ايديكوا
والأهم انها بدون اضافات أو ألوان صناعية
والأهم انها بدون اضافات أو ألوان صناعية
0 Comments